Saturday, August 19

बाढी पहिरोमा परि देशभर ३६ जना भन्दा बढीको मृत्यु/१२ जनाभन्दा बढी वेपत्ता / मध्य तथा पूर्वी तराइका कतिपय भुभाग डुबानमा ।

बाढी पहिरो/बिभिन्न जिल्ला

विगत केही दिनदेखिको बाढी र पहिरोबाट देशभर जनधनको क्षति भएको छ । हिजो रातीसम्म ३६ जनाको मृत्यु भएको र १२ जनाभन्दा बढी वेपत्ता भएको गृहमन्त्रालयले जनाएको छ । घटनाको विस्तृत विवरण नआइसकेकोले यो संख्या अझै बढ्न सक्ने गृहमन्त्रालयको भनाई छ । सुनसरीको इटहरी नजिक ट्याङ्ग्रा खोला र बुढी खोलामा आएको बाढीले ६ जनाको मृत्यु भएको छ । यसैगरी घरमा पानी पसेपछि इटहरी ४ आइतबारेमा एकजनाको मृत्यु भएको प्रहरीले जनाएको छ । सो क्षेत्रमा केही व्यक्ति बाढी बाट हराईरहेको हाम्रा समाचारदाताले जनाएका छन् । बाढीका कारण त्यस क्षेत्रमा यातायात, संचार र विद्युत सेवा प्रभावित भएको छ ।

लगातारको वर्षाले विराटनगरका विभिन्न ठाउँहरु डुबानमा परेका छन् । घरभित्र समेत पानी पसेकाले विराटनगर लगायत त्यस वरिपरिका क्षेत्रको जनजीवन प्रभावित भएको छ । विराटनगर विमानस्थल डुबानमा परेपछि विराटनगरबाट हुने उडान र अवतरण पुर्ण रुपमा रोकिएको छ । यसैगरी दुहबीस्थित नेपाल विद्युत प्राधिकरणको ग्रीड डुबानमा पर्दा पुर्वाञ्चलभरी विद्युत प्रसारण रोकिएको छ । यसैवीच मोरङको लेटाङ र नेमुवामा खोलाले बगाएको अवस्थामा दुई जनाको शव फेला परेकेा मोरङ प्रहरीले जनाएको छ ।

अविरल वर्षापछि आएको बाढीका कारण झापामा ७ जना बेपत्ता भएका छन् । वेपत्तामध्ये २ जनाको शव फेला परेको जिल्ला दैवि प्रकोप उद्धार समितिले

जनाएको छ । झापामा ७ सय ८९ घर डुबानमा परेका छन् ।

बाँकेमा पनि बाढीबाट ४ जनाको मृत्यु भएको छ । अविरल वर्षा पछि राप्ती नदीमा आएको बाढीबाट बाके जिल्लाको राप्ती नदी किनाराका होलिया, फत्तेपुर गंगापुर मटैया लगाएत एक दर्जन भन्दा बढी गाउहरुको डुबानको चपेटामा परेका छन । बाढीमा परेर सोही क्षेत्रमा एक जना पुरुषको शब फेला परेको छ । चितवनको माडी नगरपालिकामा बाढीबाट ३ सय घर डुवानमा परेका छन् । माडीस्थित रिउ खोला र रिउ खोलामा मिसिने अन्य खोलाहरुमा आएको बाढीले ३ सय घर डुवानमा परेका हुन् । खरकटा पुल र चितै पुल बाढीले बगाएपछि आवागमन अवरुद्द बनेको छ । बाढीले चितवनकै सौरहाका होटल गाउँहरु समेत डुवानमा परेका छन् । बाढीकै कारण नारायणगढ मुगलिङ सडक बन्द गरीएको छ । माथीबाट बाढी र पहिरो झरेपछी सडक बन्द गरीएको जिल्ला प्रहरी कार्यालय चितवनले जनाएको छ ।

बबई बाढीका कारण बारबर्दियामा एकजना बेपत्ता भएका छन् । बाढीले जिल्लाका विभिन्न ठाउँका करिव २ सयभन्दा बढी घर डुवानमा पर्नुका साथै तीनदर्जन भन्दा बढी घरहरुमा क्षति पुगेको छ । बासगडी नगरपालिकास्थित ४ स्थानमा र ठाकुरबाबास्थित १ ठाउँमा गरी ५ वटा पुलमा समेत क्षति पुगेको छ । दाङको तुलसीपुर उपमहानगरपालिका फूलवारीमा स्थानीय तुहि खोलाले बगाउँदा एकजनाको मृत्यु भएको छ । दाङको घोराही तुलसिपुर सडक अन्तर्गत तुलसिपुरको मोतीपुर सडक बगाएको छ ।

रौतहटको देवाहीगोनाही गाउँपालिका–२ को जोहरटोलमा लालबकैया नदीले पूर्वतर्फको बाँध कटान गर्दा २ सय भन्दा बढि सर्वसाधारण फँसेका छन् । नदी कटान क्षेत्र निरीक्षण गर्न पुगेका प्रहरीहरु पनि बाढीमा फसेको जिल्ला प्रहरी कार्यालय रौतहटले जनाएको छ । बाढीमा पसेका मानिसहरु गाउको पक्की घरको छतमा सुरक्षित अवस्थामा रहेको तर, उद्धारमा कठिनाइ भएको प्रहरीको भनाइ छ ।

वर्षाका कारण सप्तरी जिल्लाको विभिन्न नगरपालिका र गाउँपालिकाहरुमा आएको बाढीका कारण करिब २ हजार घर डुबानमा परेका छन् भने ५ सय परिवार विस्थापित भएका छन् । तिलाठी कोइलाडी गाउँपालिकाको वडा नम्वर–५ कुशहा र बनरझुलाको वस्तीमा जिता नदीको बाढी पसेका कारण ३ सय ५० परिवार घर छाडेर सडक तथा सुरक्षित स्थानमा बसेका छन् । वर्षा नरोकिएका कारण चारैतर्फ पानी बगिरहेका कारण केही परिवार वस्तीबाट सुरक्षित स्थानसम्म पुग्न सक्ने अवस्था छैन । 

सर्लाहीमा दुई दिनदेखी लगातार परेको पानीका कारण घर भासिदा थिचीयर धनकोल गाउपालिकामा १ जनाको मृत्यु भएको छ । अविरल वर्षापछि आएको पहिरोले पुरिएर बिहान सिन्धुलीमा एकै परिवारका ४ जनाको मृत्यु भएको छ । वर्षासंगै आएको पहिरोमा पुरिएर मकवानपुरको भीमफेदी गाउँपालिका इपामा १ जनाको मृत्यु भएको छ ।।

Leave a Reply

Your email address will not be published. Required fields are marked *