दशैंमा घर फर्कनेहरुसँग यातायात व्यवसायीहरुले तोकिएको भन्दा बढी भाडा लिने गरेको भन्ने गुनासो आएपछि जिल्ला ट्राफिक प्रहरी कार्यालय बनेपाले विपि राजमार्गमा सवारी चेक जाँच शुरु गरेको छ । जिल्ला ट्राफिक प्रहरी कार्यालय बनेपाले जिल्लाको मुख्य राजमार्ग विपी राजमार्गमा अनुगमन गरी चालक र यात्रुहरुसँग आवश्यक सोधपुछ गर्ने काम थालेको हो । सोही क्रममा विपि राजमार्गको रोशी गाउँपालिकाको कालढुंगा र नमोबुद्ध नगरपालिकाको एक नम्बर पुलमा छड्के जाँच गरिएको छ । दशैंमा क्षमता भन्दा बढी यात्रु बोक्ने र बढी भाडा असुल्ने काम न्युनिकरण गर्न जनप्रतिनिधि र प्रहरी प्रशासनले संयुक्त रुपमा अनुगमन गरेको हो ।
