काठमाडौं, मंसिर १५:आज उद्घाटन हुने १३औं दक्षिण एशियाली खेलकुद साग प्रतियोगिताको औपचारिक उद्घाटनको पहिलो दिन चारओटा विभिन्न खेलहरुको आयोजना हुदैछ । साग भलिबल प्रतियोगिता भने गत बुधबारबाटै सुरु भईसकेको छ । औपचारिक उद्घाटनको पहिलो दिन आज काठमाडौंमा भलिबल, कराँते र खोखोको खेल सुरु हुनेछ भने पोखरामा ब्याडमिण्टनको खेल हुने कार्यक्रम छ । त्रिपुरेश्वरस्थित राष्ट्रिय खेलकुद परिषद्को कभर्ड हलमा भारत र श्रीलंकाबीच पुरुष भलिबलको सेमिफाइनल खेल हुनेछ । यसैगरी भलिवलकै दोस्रो सेमिफाइनल खेलमा दिउँसो पाकिस्तान र बंगलादेशले प्रतिस्पर्धा गर्दैछन् । यसैगरी कराँतेको पहिलो दिन उद्घाटन र खेल तालिका सार्वजनिक कार्यक्रम मात्रै हुनेछ । करातेका खेलहरु भने भोलिबाट हुने कार्यक्रम छ । किर्तिपुर नयाँ बजारमा खोखोको महिला र पुरुष दुवैतर्फको खेल आजैबाट सुरुहुनेछ । खोखोको महिला र पुरुष दुबै समूहमा नेपालले बंगलादेशसंग खेल्दैछ भने भारतले श्रीलंकाविरद्ध प्रतिस्पर्धा गर्नेछ । यसैगरि पोखरा रंगशालाको कभर्ड हलमा ब्याडमिन्टनतर्फ पुरुष र महिला टिम इभेन्ट्सको क्वाटरफाइनल र सेमिफाइनलको खेल हुने कार्यक्रम छ ।।
